Viti i ri shkollor 2026-2027 për nxënësit e arsimit parauniversitar do të nisë më 14 shtator. Ministria e arsimit ka publikuar kalendarin me data kryesore të mësimit, pushimeve dhe provimeve për vitin e ardhshëm shkollor.
Mësimi për pjesën më të madhe të nxënësve do të përfundojë më 18 qershor 2027, ndërsa maturantët, ashtu si çdo vit, do ta mbyllin procesin mësimor më herët, më 4 qershor, për t’u përgatitur për provimet e Maturës Shtetërore.
Pushimet e dimrit për nxënësit e arsimit bazë dhe të mesëm të lartë janë përcaktuar nga 24 dhjetori 2026 deri më 4 janar 2027. Ndërkohë, nxënësit e arsimit bazë do të kenë edhe pushimet pranverore, të cilat do të zhvillohen nga 29 marsi deri më 2 prill 2027.
Pas përfundimit të procesit mësimor nis edhe sezoni i provimeve. Provimet e Maturës Shtetërore janë planifikuar të zhvillohen në periudhën nga 7 deri më 28 qershor 2027.
Ndërsa për nxënësit që përfundojnë arsimin bazë, provimet kombëtare do të zhvillohen nga 21 deri më 30 qershor. Datat e detajuara për secalin provim pritet të përcaktohen në vijim.
