Mësimdhënësja Sebahate Sopjani ka ngritur shqetësime lidhur me mënyrën se si zhvillohet procesi mësimor në shkollat e Kosovës, duke vënë theksin te nevoja që nxënësit të mos mësojnë vetëm atë që është e shkruar në libra, por ta lidhin njohurinë me situata konkrete të jetës së përditshme.
“Ne nuk i mësojmë fëmijët për jetën”, ka deklaruar mësuesja Sopjani në emisionin “E diela vlen”, në ATV, shkruan AlbanianEducation.net.
Ajo ka argumentuar se nxënësit shpesh marrin njohuri për tema të caktuara, por jo gjithmonë udhëzohen se si t’i zbërthejnë dhe t’i zbatojnë ato në realitet.
Sipas saj, edhe temat e zakonshme mësimore mund të shfrytëzohen për t’i përgatitur fëmijët për situata reale. Ajo sjell si shembull temën e familjes.
“Kur flasim për familjen, duhet ta zbërthejmë dhe të dalim në jetën reale. Gjyshi, gjyshja, nëna, babai – cila edukatë duhet të jetë, cilat janë rregullat?”, ka thënë mësuesja Sebahate.
