Shkolla shqipe “Naim Frashëri” në Nyon ka shprehur mirënjohje dhe falënderim të veçantë për prof. Besnik Pajazitin, për përkrahjen e vazhdueshme dhe angazhimin e tij në mbështetje të shkollës dhe arsimit shqip në diasporë.
Në një postim të publikuar në rrjetet sociale, shkolla e ka vlerësuar Pajazitin për kontributin e tij në ruajtjen dhe promovimin e gjuhës, kulturës dhe arsimit shqiptar.
Sipas shkollës, përmes angazhimit të tij janë krijuar kontakte dhe ura bashkëpunimi me institucione, universitete dhe personalitete të ndryshme, me synim mbështetjen dhe zhvillimin e mëtejshëm të Shkollës Shqipe “Naim Frashëri” në Nyon.
Një nga rezultatet e këtij angazhimi, sipas shkollës, është edhe vendosja e kontaktit dhe bashkëpunimi me Shtëpinë Botuese ALBAS në Kosovë, përmes të cilit shkolla përfitoi një donacion me libra dhe materiale mësimore për nxënësit.
Shkolla ka theksuar rëndësinë e mbështetjes nga bashkëvendësit dhe individët që kontribuojnë në ruajtjen e gjuhës shqipe dhe edukimin e brezave të rinj shqiptarë në diasporë.
“Faleminderit prof. Besnik Pajaziti për përkrahjen, përkushtimin dhe kontributin tuaj të çmuar për shkollën tonë”, thuhet në mesazhin e falënderimit të Shkollës Shqipe “Naim Frashëri” në Nyon.
