Ish-maturantët e gjeneratës 1986 të Gjimnazit “Zenel Hajdini” janë ribashkuar pas katër dekadash për të kujtuar një nga periudhat më të bukura të jetës së tyre dhe për të ripërtërirë miqësitë e krijuara në bankat e shkollës.
Takimi, i organizuar 40 vjet pas mbrëmjes së maturës, mblodhi bashkë ish-nxënës që ndanë kujtime nga vitet e shkollimit, duke dëshmuar se lidhjet e krijuara gjatë asaj kohe kanë mbetur të forta pavarësisht rrjedhës së viteve.
Nga Gjimnazi “Zenel Hajdini” theksojnë se ky ribashkim është një dëshmi e traditës dhe vlerave që shkolla ka kultivuar ndër breza, duke krijuar jo vetëm arritje akademike, por edhe miqësi të qëndrueshme.
Këtë vit, gjimnazi ka përcjellë me krenari edhe gjeneratën e 77-të të maturantëve, duke vazhduar historinë e një institucioni që ndër vite ka edukuar mijëra të rinj.
“Njëherë maturant, gjithmonë pjesë e historisë së shkollës”, është mesazhi që shoqëroi këtë takim të veçantë, i cili rikujtoi se vitet kalojnë, por kujtimet dhe lidhjet e krijuara në shkollë mbeten të paharrueshme.
Takimi u përmbyll në një atmosferë të ngrohtë, me urimet që tradita e ribashkimeve të vazhdojë edhe në vitet që vijnë, duke mbajtur gjallë lidhjen mes brezave të Gjimnazit “Zenel Hajdini”.
