Nxënësi Orik Llapashtica, i klasës 3/3 në SHFMU “Iliria” në Prishtinë, ka arritur një sukses të jashtëzakonshëm në NEO Science Olympiad 2026, garë prestigjioze ndërkombëtare e mbajtur në New York, Shtetet e Bashkuara të Amerikës, ku përfaqësoi me dinjitet Kosovën.
Falë talentit, përkushtimit dhe rezultateve të shkëlqyera, Oriku u shpërblye me Medaljen e Argjendtë në Matematikë dhe Medaljen e Bronztë në Shkencë, duke u renditur mes nxënësve më të suksesshëm të kësaj olimpiade ndërkombëtare.
Nga SHFMU “Iliria” vlerësuan se ky sukses është dëshmi e punës së palodhshme, disiplinës dhe potencialit të madh që kanë nxënësit kosovarë për të konkurruar me sukses edhe në arenën ndërkombëtare.
“Orik Llapashtica është krenari për shkollën, familjen dhe gjithë Kosovën. Suksesi i tij është frymëzim për bashkëmoshatarët dhe dëshmi se puna dhe përkushtimi shpërblehen me rezultate të mëdha”, thuhet në urimin e shkollës.
Ky është një tjetër sukses i rëndësishëm për arsimin kosovar në garat ndërkombëtare, duke dëshmuar nivelin dhe potencialin e nxënësve të vendit.
