Zgjedhja e profesionit dhe përgatitja për tregun e punës pritet të marrin një rol më të strukturuar që në shkollën e mesme. Një model i ri për zhvillimin e aftësive për jetën dhe orientimin e karrierës do të zbatohet në 30 shkolla të mesme në vend.
Nisma vjen në një kohë kur një pjesë e konsiderueshme e të rinjve mbeten jashtë si arsimit, ashtu edhe tregut të punës. Sipas të dhënave të OECD-së, rreth 20.9% e të rinjve të moshës 15–24 vjeç në Shqipëri nuk janë as në punë, as në arsim dhe as në trajnim, një nivel më shumë se dyfishi i mesatares së Bashkimit Europian.
Projekti, i financuar nga Bashkimi Europian dhe i zbatuar nga UNICEF Albania në partneritet me Qendrën për Aftësi Konkurruese, do të zgjasë 18 muaj dhe synon t’i ndihmojë nxënësit të marrin vendime më të informuara për vazhdimin e arsimit dhe rrugën e tyre profesionale.
Në fokus do të jenë aftësi që konsiderohen gjithnjë e më të rëndësishme për tregun e sotëm të punës, si mendimi kritik, komunikimi, bashkëpunimi, kreativiteti dhe aftësitë digjitale. Për këtë qëllim parashikohet zhvillimi i moduleve digjitale, mjeteve praktike për shkollat, si dhe trajnimi i mësuesve, drejtuesve dhe koordinatorëve të orientimit të karrierës.
Një nga elementet kryesore është ngritja e një modeli të strukturuar të këshillimit për karrierën brenda shkollës. Nxënësit synohet të ndihmohen të identifikojnë më mirë aftësitë dhe interesat e tyre, por edhe të njohin mundësitë që ofron tregu përpara se të vendosin për universitetin apo profesionin që do të ndjekin.
Programi parashikon gjithashtu një lidhje më të drejtpërdrejtë mes shkollave dhe tregut të punës, përmes bashkëpunimit me zyrat e punësimit, universitetet, bizneset dhe komunitetet lokale.
