Nxënësja e Gjimnazit “Eqrem Çabej” në Vushtrri, Rita Spahiu, po përfaqëson Kosovën në Kampin Veror Rajonal Frankofon, i cili po mbahet në Moldavi, shkruan AlbanianEducation.net.
Kampi organizohet nga Ministria e Arsimit të Moldavisë, me mbështetjen e CREFECO-s (Qendra Rajonale Frankofone për Evropën Qendrore dhe Lindore) dhe Organizatës Ndërkombëtare të Frankofonisë (OIF).
Në këtë aktivitet ndërkombëtar po marrin pjesë të rinj nga nëntë shtete të Evropës Qendrore dhe Lindore, duke krijuar mundësi për shkëmbim kulturor, gjuhësor dhe njohurish mes të rinjve.
Gjatë mbrëmjes së kaluar, Kosova u përfaqësua nga Rita Spahiu, e cila gjatë prezantimit të saj foli edhe për qytetin e Vushtrrisë, duke e prezantuar atë para pjesëmarrësve të kampit.
Pjesëmarrja e Ritës në këtë aktivitet ndërkombëtar përbën një vlerësim për punën dhe angazhimin e saj, si dhe një mundësi për promovimin e Kosovës dhe Vushtrrisë në një mjedis ndërkombëtar.
Urime Ritës, Gjimnazit “Eqrem Çabej” dhe Vushtrrisë për këtë përfaqësim të denjë!
