Nxënësit e Gjimnazit “Eqrem Çabej”, të cilët po qëndrojnë në Gjermani në kuadër të përfaqësimit të Kosovës, kanë zhvilluar një sërë aktivitetesh gjatë ditës së parë të qëndrimit të tyre.
Sipas njoftimit të publikuar nga gjimnazi, aktivitetet u përqendruan në prezantime të ndërsjella, ku nxënësit patën mundësi të paraqesin punën dhe angazhimin e tyre.
Paraqitjet e nxënësve kosovarë janë vlerësuar pozitivisht nga nikoqirët, të cilët, sipas shkollës, u kanë përcjellë komplimente dhe vlerësime inkurajuese për angazhimin e tyre.
Gjatë qëndrimit, nxënësit u vizituan edhe nga Konsulli i Kosovës në Shtutgart, Hamdi Bërbatovci. Sipas “Eqrem Çabejt”, konsulli u shpreh me fjalë miradije për nxënësit, pasi pa nga afër kontributin dhe paraqitjen e tyre në gjuhën gjermane.
Qëndrimi në Gjermani po shërben kështu si një mundësi për nxënësit e “Eqrem Çabejt” që të shkëmbejnë përvoja, të prezantojnë njohuritë e tyre dhe të përfaqësojnë Kosovën në aktivitetet e zhvilluara atje.
