Në Komunën e Rahovecit ka nisur procesi i digjitalizimit të shkollave, përmes vendosjes së tabelave digjitale në institucionet arsimore.
Deri tani janë vendosur 14 tabela digjitale, ndërsa në kuadër të projektit planifikohet që në shkollat e Komunës së Rahovecit të vendosen gjithsej 135 tabela digjitale.
“Në kuadër të projektit për digjitalizimin e shkollave, Drejtoria Komunale e Arsimit ka filluar vendosjen e tabelave digjitale në institucionet arsimore të komunës sonë. Përfundoi vendosja e 14 tabelave digjitale, ndërsa deri në përfundim të projektit planifikohet të vendosen gjithsej 135 tabela digjitale në shkollat e Komunës së Rahovecit”, thuhet në njoftimin e Komunës.
Projekti synon avancimin e procesit mësimor dhe krijimin e kushteve për një mësimdhënie më cilësore dhe bashkëkohore. Përmes përdorimit të teknologjisë në arsim, synohet edhe krijimi i mundësive të reja për zhvillimin e kompetencave dhe shkathtësive të nxënësve.
Komuna e Rahovecit ka uruar nxënësit dhe stafin pedagogjik për këtë hap drejt modernizimit të procesit arsimor.
