“Kujt?”
Kush i ka fajet: mësimdhënësi, drejtoria e shkollës, DKA-ja, MASHTI apo prindi?
Mendoj se përgjegjësia nuk mund t’i atribuohet vetëm një pale. Problemi është më i gjerë dhe lidhet me vetë organizimin e sistemit arsimor.
Sistemi arsimor në Kosovë ka nevojë për rishikim të Ligjit për Arsimin Parauniversitar dhe të udhëzimeve administrative që rregullojnë vlerësimin dhe avancimin e nxënësve.
Duhet të shqyrtohet mundësia që, në rastet kur nxënësi nuk i ka arritur kompetencat themelore të shkrim-leximit dhe matematikës, veçanërisht në klasat e hershme, të ekzistojnë mekanizma më efektivë për mbështetje dhe, kur është e nevojshme, mundësia e përsëritjes së klasës në interes të vetë nxënësit.
Kalimi automatik i nxënësve pa zotëruar shkrim dhe lexim krijon vështirësi të mëdha në klasat e mëvonshme. Në shumë raste, mësimi plotësues dhe mbështetës nuk arrin ta kompensojë mungesën e kompetencave bazë, sepse nxënësi ka vështirësi të ndjekë edhe mësimin e rregullt.
Prandaj, nevojitet një debat profesional ndërmjet mësimdhënësve, prindërve, shkollave, DKA-ve dhe MASHTI-t për të gjetur zgjidhje që garantojnë se çdo nxënës fiton kompetencat themelore para se të avancojë në nivelet e tjera të arsimit.
Qëllimi nuk duhet të jetë vetëm kalimi nga një klasë në tjetrën, por sigurimi i një edukimi cilësor dhe i kompetencave bazë për secilin nxënës.
