I/e dashur mësues/e,
Tani që po nis një vit i ri shkollor, gjëja e parë që duhet të kesh me vete është zemra e mbushur me dashuri. Prindërit që na besojnë fëmijët e tyre janë thesari më i madh, ndaj kujdesu për ta me gjithë shpirt. Zemrat e fëmijëve janë të çiltra dhe të pastra; ofroju dashuri që të fitosh dashuri, respektoji njëjtë që të të respektojnë dhe trajtoji të gjithë barabartë, pa bërë kurrë dallime.
E dimë se rol të veçantë ka edhe prindi në edukimin e fëmijës, por po ata fëmijë që kanë fatin e hidhur të mos i kenë prindërit pranë, apo që vijnë nga plagët e heshtura të jetës? A thua t’ua kthejmë shpinën? Përkundrazi! Pikërisht për ta, shkolla dhe banka jonë duhet të jenë streha më e sigurt, vendi ku ndihen të përqafuar, të mbrojtur dhe të barabartë me të tjerët. Për ta, ne nuk jemi thjesht mësues, por shpesh mburoja dhe ngrohtësia që u mungon jashtë dyerve të shkollës.
Le të jemi ai shembull i gjallë që secili fëmijë do ta ketë me vete gjithë jetën. Fjalët zbehen, por ndjesia e të qenit i vlerësuar mbetet përgjithmonë. Le të jemi modeli i mirë i njerëzillëkut, që edhe ata të rriten duke u bërë njerëz të mirë, me shpirt të madh e integritet.
Të qenit mësues nuk është thjesht një profesion, por një mision hyjnor për të lënë gjurmë të pashlyeshme në shpirtrat e vegjël që na besohen. Le të jetë ky vit një udhëtim i bukur durimi, mirëkuptimi dhe suksesi, ku asnjë fëmijë nuk mbetet kurrë në hije!
Kjo lidhje e shenjtë dhe e pashlyeshme ndër breza ka prekur thellë edhe shkrimtarët tanë të mëdhenj, të cilët i kanë thurur vargje mirënjohjeje figurës së mësuesit. Si atëherë, ashtu edhe sot, pesha e këtij misioni ruhet në çdo zemër që di të duajë:
Pat ikur mësuesi im në Turqi,
Unë Abetaren e lava me lot,
Parasysh më rrinte fytyra e tij,
E nuk mund ta harroj as sot.
(Rexhep Hoxha)
Këto vargje të pavdekshme na kujtojnë se mësuesi i vërtetë nuk largohet kurrë nga shpirti i nxënësit. Abetarja e larë me lot mbetet dëshmia se gjurma që lëmë te fëmijët është trashëgimia jonë më e bukur për jetë.
Më shumë dashuri për secilin fëmijë!
