Shkolla “Xhemajl Mustafa” në Prishtinë u ka kërkuar prindërve që, nëse nuk dëshirojnë që fëmijët e tyre të marrin pjesë në aktivitetet jashtëmësimore pas përfundimit të orarit të rregullt, ta konfirmojnë këtë përmes një deklarate me shkrim.
Në dokumentin e shpërndarë për prindërit thuhet se deklarata vlen për mospjesëmarrjen në klube, aktivitete rekreative, artistike, sportive apo orë plotësuese që zhvillohen në kuadër të mësimit tërëditor.
Prindërve u kërkohet të përcaktojnë edhe arsyen e tërheqjes së fëmijës, ndërsa marrin përsipër që ta largojnë atë nga ambientet e shkollës menjëherë pas përfundimit të mësimit të rregullt.
Por vetë nevoja për një deklaratë të tillë hap dilema rreth mënyrës se si po funksionon mësimi tërëditor. Nëse një pjesë e prindërve po zgjedhin që fëmijët të mos vazhdojnë aktivitetet pas orarit të rregullt, shtrohet pyetja nëse modeli po arrin qëllimin për të cilin është prezantuar dhe sa tërheqëse e funksionale është oferta e aktiviteteve për nxënësit.
Po ashtu, mbetet për t’u parë nëse bëhet fjalë vetëm për një procedurë administrative të shkollës apo nëse tërheqja e nxënësve është shenjë e problemeve më të gjera në zbatimin e mësimit tërëditor. Numri i prindërve që kanë kërkuar tërheqjen e fëmijëve do të ishte treguesi kryesor për të kuptuar nëse kemi të bëjmë me raste individuale apo me një problem më serioz të këtij modeli. /Marrë nga Kujdestari.info
