Komuniteti shqiptar në Herborn të Hessenit bëhet gati për një tjetër hap të rëndësishëm në ruajtjen dhe promovimin e gjuhës shqipe. Më 14 shtator 2026 nis mësimi në shkollën Shqipe në Herborn, ku deri tani janë regjistruar 30 nxënës, shkruan AlbanianEducation.
Mësimi do të zhvillohet në ambientet e Johanneum Gymnasium Herborn, në adresën Otto-Wels-Straße 1a, 35745 Herborn, duke filluar nga ora 15:00. Mësuese e nxënësve do të jetë Mrika Veliu Mustafa.
Një nga veçoritë e rëndësishme të kësaj nisme është se mësimi i gjuhës shqipe është pa pagesë. Shqipja do të zhvillohet si lëndë zgjedhore, ndërsa kreditet e fituara nga nxënësit do të pasqyrohen në certifikatën e notave.
Hapja e kësaj shkolle përbën një zhvillim të rëndësishëm për komunitetin shqiptar në Herborn dhe në përgjithësi për shqiptarët në Hessen. Organizatorët e konsiderojnë këtë një hap konkret në drejtim të ruajtjes së gjuhës, identitetit dhe lidhjes së brezave të rinj me kulturën shqiptare.
Nga LAPSH Hessen theksojnë se hapja e klasave të reja të gjuhës shqipe është pjesë e angazhimit të vazhdueshëm për përhapjen dhe institucionalizimin e mësimit të shqipes në Hessen.
Të interesuarit për regjistrim dhe informacione shtesë mund të kontaktojnë LAPSH Hessen përmes faqes zyrtare, adresës elektronike ose numrit të telefonit të publikuar nga organizata.
Shkolla Shqipe në Herborn i hap dyert më 14 shtator, me synimin që brezi i ri shqiptar të ruajë dhe ta zhvillojë gjuhën e të parëve edhe larg atdheut.
LAPSH Hessen u uron mirëseardhje të gjithë nxënësve dhe familjeve të tyre në këtë nismë të rëndësishme për komunitetin shqiptar.
