Maturantja e Gjimnazit “Asim Vokshi” në Bajram Curr, Ejsi Dushaj, është vlerësuar për rezultatet e saj të shkëlqyera gjatë gjithë viteve të shkollimit, duke përfunduar gjimnazin me mesatare 10.00, shkruan AlbanianEducation.net.
Sipas njoftimit të publikuar nga shkolla, Dushaj është dalluar për përkushtimin, disiplinën dhe seriozitetin në procesin mësimor. Në provimin me zgjedhje të Maturës Shtetërore, në lëndën e Biologjisë, ajo ka marrë gjithashtu notën 10.00.
Arritja e saj më e fundit është pranimi në studimet për Mjekësi, pas rezultateve të larta të arritura në provimin pranues.
Gjimnazi “Asim Vokshi” e ka vlerësuar Ejsi Dushajn jo vetëm për suksesin akademik, por edhe për përgjegjësinë, korrektësinë dhe shembullin e saj gjatë viteve të shkollimit.
“Shkolla jonë ndihet krenare për këtë arritje dhe beson se ajo do të vazhdojë të shkëlqejë edhe në rrugëtimin e saj universitar”, thuhet në urimin e shkollës.
Nga Gjimnazi “Asim Vokshi” i kanë uruar Dushajt suksese të mëtejshme në studimet universitare dhe në rrugën drejt profesionit të mjekut.
