Shkolla “Emin Duraku” në Dragobil ka shprehur mirënjohje për Kastrati Store dhe Kastrati Center në Malishevë, për mbështetjen e dhënë për të dytën herë në përmirësimin e kushteve në ambientet e shkollës, shkruan AlbanianEducation.net.
Sipas njoftimit të shkollës, falë këtij bashkëpunimi është bërë e mundur vendosja e perdeve në të gjithë katin e dytë të objektit shkollor, duke përfshirë sallat e mësimdhënësve, kabinetet dhe zyrën e drejtorit.
Investimi, në vlerë prej 1,685 eurosh, synon të kontribuojë në krijimin e kushteve më të përshtatshme për mësim dhe punë, veçanërisht duke pasur parasysh se klasat e shkollës janë të pajisura me projektorë, të cilët përdoren gjatë zhvillimit të orëve mësimore dhe projekteve të ndryshme.
Drejtori i shkollës “Emin Duraku”, Arianit Paqarizi, ka falënderuar bizneset për mbështetjen dhe bashkëpunimin e vazhdueshëm, duke vlerësuar se përkrahja e komunitetit dhe bizneseve lokale është e rëndësishme për krijimin e kushteve më të mira për edukimin e nxënësve.
“Bashkëpunime të tilla tregojnë se kur komuniteti dhe bizneset lokale qëndrojnë pranë shkollës, krijohen kushte më të mira për edukimin e brezave të rinj”, thuhet në njoftimin e shkollës.
