Nxënësja e gjimnazit “18 Tetori” në Lushnjë, Ingrid Haxhiu, është renditur e para në Shqipëri për pranimin në degën “Mjekësi e Përgjithshme”.
Arritja e saj përbën një tjetër sukses të rëndësishëm për gjimnazin “18 Tetori”, i cili ndër vite është dalluar për rezultatet e nxënësve dhe sukseset e tyre në konkurse dhe gara të ndryshme.
Por suksesi i nxënësve lushnjarë nuk përfundon me vendin e parë. Me një diferencë shumë të vogël pikësh, vendin e tretë në rang vendi për degën “Mjekësi e Përgjithshme” e ka fituar një tjetër nxënëse nga Lushnja, Abela Dinaku.
Dy rezultatet e larta e vendosin Lushnjën në vëmendje për suksesin e nxënëseve të saj në një nga degët më të kërkuara dhe konkurruese të arsimit të lartë në Shqipëri.
Gjimnazi “18 Tetori” është vlerësuar ndër vite si një prej institucioneve arsimore me rezultate të larta, ndërsa shumë prej nxënësve të tij janë dalluar edhe me medalje ari.
Suksesi i Ingrid Haxhiut dhe Abela Dinakut është një tjetër dëshmi e punës së nxënësve, mësuesve dhe familjeve të tyre në përgatitjen për një nga sfidat më të mëdha akademike.
