Elsa Xhemajli, 11-vjeçarja nga Drenasi, po shënon një sukses të veçantë në garat ndërkombëtare të gjuhës angleze, pasi është kualifikuar në tri finale prestigjioze që do të zhvillohen gjatë vitit 2026, shkruan AlbanianEducation.net.
Brenda një periudhe prej vetëm katër muajsh, Elsa ka siguruar pjesëmarrjen në tri gara ndërkombëtare, ku do të përfaqësojë Kosovën përballë nxënësve të talentuar nga vende të ndryshme të botës.
Ajo do të marrë pjesë në finalen e SiL English Language Olympiad, e cila do të zhvillohet në Oxford të Anglisë në dhjetor 2026. Po ashtu, në shtator do të jetë pjesë e finales botërore të Hippo English Olympiad, që mbahet në Spoleto të Italisë, ndërsa në gusht do të garojë në finalen e Euroasian Spelling Bee, ku pjesëmarrësit sfidohen në drejtshkrim, gërmëzim, fjalor dhe shkathtësi gjuhësore.
Suksesi i Elsës vjen si rezultat i një pune të vazhdueshme dhe përkushtimit të saj ndaj gjuhës angleze. Në vitin 2025, ajo ishte gjysmëfinaliste e Hippo English Olympiad në Jesolo të Italisë, duke u renditur ndër nxënësit më të suksesshëm në kategorinë e saj.
Kualifikimi në tri finale ndërkombëtare brenda një viti përbën një arritje të rëndësishme për 11-vjeçaren nga Drenasi dhe një tjetër përfaqësim të Kosovës në arenën ndërkombëtare të garave gjuhësore.
Me talentin, përkushtimin dhe rezultatet e saj, Elsa Xhemajli po ndërton një rrugëtim të suksesshëm në garat ndërkombëtare dhe po dëshmon potencialin e të rinjve nga Kosova në fushën e gjuhëve të huaja.
