Ekipi i Kosovës ka mbërritur në Shanghai të Kinës për të marrë pjesë në Olimpiadën e 67-të Ndërkombëtare të Matematikës (IMO 2026), një nga garat më prestigjioze në botë për nxënësit e talentuar në matematikë.
Ceremonia hapëse e IMO 2026 është mbajtur mbrëmë në Shanghai, ku morën pjesë delegacionet nga dhjetëra shtete, përfshirë edhe ekipin përfaqësues të Kosovës.
Kosovën në këtë olimpiadë e përfaqësojnë nxënësit: Ajan Hajrullahu, Lyron Celina, Parid Haxholli, Shpendi Deva, Entela Mirena dhe Enes Hoxha.
Ekipi udhëhiqet nga Besfort Shala në cilësinë e liderit dhe Fiton Hoxha si zëvendëslider.
Shoqata e Matematikanëve të Kosovës ka falënderuar Qeverinë e Republikës së Kosovës për mbështetjen financiare që ka mundësuar pjesëmarrjen e ekipit në këtë ngjarje ndërkombëtare, ndërsa u ka uruar suksese të gjithë garuesve në IMO 2026.
KultPlus.com
