Arlind Kukalaj nga Deçani, i cili jeton dhe punon në Kantonin Basel-Landschaft të Zvicrës, ka arritur një sukses të dyfishtë, është diplomuar në Universitetin e Bazelit, ndërsa paralelisht ka ndërtuar një karrierë të suksesshme në sektorin bankar zviceran, shkruan AlbanianEducation.net.
Arlindi ka përfunduar me sukses studimet për Bachelor of Science në Ekonomi të Biznesit (Betriebsökonomie) në Universitetin FHNW e Bazelit.
Arritja e tij bëhet edhe më mbresëlënëse duke pasur parasysh se studimet i ka ndjekur në modelin paralel me punën (berufsbegleitend). Gjatë gjithë kësaj periudhe, ai ka qenë i punësuar aktivisht në një bankë të njohur zvicerane, duke dëshmuar përkushtim, disiplinë dhe aftësi për të harmonizuar kërkesat e studimeve universitare me përgjegjësitë profesionale.
Ky është një shembull shumë i mirë i gërshetimit të teorisë akademike me praktikën profesionale, ku njohuritë e fituara gjatë studimeve mund të aplikohen drejtpërdrejt në sektorin financiar dhe në tregun e punës.
Suksesi i Arlindit është edhe një dëshmi se të rinjtë tanë në diasporë po arrijnë rezultate të jashtëzakonshme, duke ndërtuar me punë, dije dhe përkushtim rrugën e tyre profesionale.
Arritje të tilla na bëjnë krenarë si familjarë, si bashkëvendës dhe, mbi të gjitha, si shqiptarë nga Kosova.
Urime Arlindit për këtë arritje dhe shumë suksese të tjera në rrugëtimin e tij profesional! / AlbanianEducation.net
