Shkolla “Xhavit Ahmeti” në Prishtinë ka bërë të ditur gjendjen e furnizimit me tekste shkollore pas përfundimit të javës së parë të procesit mësimor.
Sipas të dhënave të menaxhmentit të shkollës, 15.3 për qind e nxënësve nuk janë furnizuar fare me tekste shkollore.
Ndërkohë, 69.8 për qind e nxënësve janë të furnizuar plotësisht, ndërsa 14.9 për qind janë të furnizuar pjesërisht me tekstet shkollore.
Në njoftimin drejtuar prindërve, menaxhmenti i shkollës u ka bërë thirrje atyre që të sigurojnë tekstet për fëmijët e tyre, duke rikujtuar se Ministria e Arsimit ka realizuar subvencionimin për blerjen e teksteve shkollore.
Shkolla ka theksuar se qëllimi është që çdo nxënës të jetë i pajisur me tekstet e nevojshme dhe të mund të ndjekë procesin mësimor pa pengesa.
